2026 жылғы 24 шілде мен 15 тамыз аралығында Қазақстанның шығысынан оңтүстігіне дейінгі кең аумақты қамтыған кешенді ботаникалық экспедиция ұйымдастырылды. Экспедицияның басты ерекшелігі – осыдан бір ғасырдан астам уақыт бұрын, 1924 жылы белгілі ботаник Евгения Синская жүріп өткен тарихи бағыттың қайта жаңғыртылуы.
Үш аптаға созылған ғылыми сапар Шемонаиха қаласынан басталып, Алматыға дейін жалғасты. Зерттеу бағыты Риддер, Катонқарағай, Күршім, Зайсан, Үржар, Көктұма және Сарқан өңірлерін қамтыды. Осы аумақтардағы табиғи өсімдік жамылғысы зерттеліп, өткен ғасырдағы ғылыми деректермен салыстыруға мүмкіндік беретін материалдар жиналды.
Экспедиция жұмысына Катонқарағай мемлекеттік ұлттық табиғи паркінің аға ғылыми қызметкері Глеб Болботов та қатысты. Оның қатысуы Қазақ Алтайының өсімдіктер дүниесін зерттеу және ұлттық парк аумағындағы ғылыми зерттеулерді кеңейту тұрғысынан маңызды.
Қазақстан мен Ресейдің ғалымдары бірлесіп, экспедиция бағыты бойындағы өсімдік жамылғысының қазіргі жағдайын зерделеді. Зерттеу барысында мәдени дақылдардың жабайы туыстарына жататын өсімдіктерге ерекше назар аударылды. Атап айтқанда, астық тұқымдастар, жеміс-жидек дақылдарының жабайы туыстары, итмұрын және басқа да өсімдік түрлерінен гербарийлік және тұқымдық үлгілер жиналды.
Мұндай зерттеулер тек өсімдік түрлерінің алуантүрлілігін анықтау үшін ғана емес, олардың табиғи популяцияларының қазіргі жағдайын бағалау, генетикалық ресурстарды сақтау және болашақ ғылыми зерттеулерге материал қалыптастыру үшін де маңызды.
1924 жылғы маршруттың қайта зерттелуі – ғылым тарихы мен қазіргі ботаникалық зерттеулерді байланыстыратын құнды жоба. Бір ғасыр бұрын жиналған мәліметтер мен бүгінгі зерттеу нәтижелерін салыстыру арқылы табиғи өсімдік жамылғысындағы өзгерістерді бақылауға, жекелеген түрлердің таралу ерекшеліктерін бағалауға және Қазақстанның өсімдік ресурстарын тереңірек зерделеуге мүмкіндік бар.
Үш аптаға созылған бұл экспедиция Қазақстанның әртүрлі табиғи аймақтарын қамтып қана қоймай, отандық ғылым үшін маңызды ғылыми материалдармен толықты. Қазақ Алтайынан оңтүстік өңірлерге дейінгі бағытта жүргізілген зерттеулер еліміздің өсімдіктер дүниесін зерттеу мен сақтау ісіне өз үлесін қосты.
