Усть-Язовая орманшылығы аумағында инспекторлар тарапынан тұрақты түрде патрульдеу және айналымдарды бақылау жұмыстары жүргізілуде. Кезекті патрульдеу барысында табиғи ортада мекендейтін жабайы жануарлардың іздері анықталды. Атап айтқанда, орман алқаптарында аю, елік және маралдың іздері кездесті. Бұл өңірдегі жануарлар дүниесінің табиғи мекен ету ортасының сақталғанын және орман экожүйесінің тұрақты жағдайда екенін көрсетеді.
Орманшылық қызметкерлері жануарлардың қозғалыс белсенділігін, мекендеу аймақтарын және табиғи ортадағы өзгерістерді үнемі бақылауда ұстайды. Мұндай бақылау жұмыстары жабайы жануарларды қорғау, олардың санын сақтау және табиғи тепе-теңдікті қамтамасыз ету мақсатында маңызды рөл атқарады.
Сонымен қатар орманшылық аумағында фенологиялық бақылау жұмыстары жүргізілуде. Мамандар табиғаттағы маусымдық өзгерістерді, өсімдіктердің даму кезеңдерін, ауа райының ерекшеліктерін және экожүйедегі табиғи құбылыстарды бақылап, тіркеуде. Қазіргі уақытта көктемгі-жазғы кезеңге байланысты өсімдіктердің өсу белсенділігі артып, табиғат жандана түскені байқалады.
Фенологиялық бақылаулар табиғи процестердің өзгерісін анықтауға, климаттық ерекшеліктерді зерделеуге және орман қорының жай-күйін бағалауға мүмкіндік береді. Бұл жұмыстар табиғатты қорғау және орман экожүйесін сақтау бағытындағы маңызды шаралардың бірі болып табылады.
