Аршаты орта мектебінде сібір шыршасының тұқымын себу бойынша кезекті акция өтті. Іс-шараға орманды қалпына келтіру инженері Гүлжаз Аманбаева, Аршаты орманшылығының инспекторлары және «Жас эколог» мектеп орманшылығының оқушылары қатысты.
Акция басталмас бұрын Гүлжаз Аманбаева оқушыларға тұқым себу тәртібі, жас көшеттерге күтім жасау ережелері және мұндай шаралардың экожүйені сақтау үшін маңызы туралы айтып берді. Ал орманшы Жомарт Аманбаев тұқым сапасын сақтау үшін бүршіктерді қалай дұрыс жинау керектігін, олардан тұқымды қалай алатынын және себуге дейін қандай сақтау шарттары қажет екенін түсіндірді.
Мамандардың жетекшілігімен жас орманшылар тұқымдарды жеке контейнерлерге мұқият септі. Енді алда – ұзақ жылдарға созылатын күтім мен қамқорлық бар, бірақ болашақта осы кішкентай тұқымдар биік сібір шыршаларына айналып, ауаны тазартып, көлеңке беріп, көптеген жануарларға пана болмақ.
Орманның болашағы – дәл осы жас экологтардың қолында!
