Қыс мезгілі – табиғатты қорғау қызметкерлері үшін ең жауапты кезеңдердің бірі. Қар жамылған орман алқаптары жануарлар дүниесін зерттеуге ерекше мүмкіндік береді. Дәл осы уақытта аң-құстардың іздері айқын көрініп, олардың қозғалыс бағыты мен тіршілік ету аумағын нақты анықтауға болады.
Алтай орманшылығының 1-ші орман шебер бөлімінің мамандары қысқы санақ жұмыстарын ұйымдасқан түрде жүргізді. Санақ барысында орман алқаптары бірнеше бағыт бойынша тексеріліп, жабайы аңдар мен құстардың іздері тіркелді. Әрбір анықталған із арнайы есепке алынып, деректер салыстырмалы түрде талданды.
Қысқы санақтың негізгі мақсаты – жануарлар санының динамикасын бақылау, олардың таралу аймағын анықтау және сирек кездесетін түрлердің жағдайын бағалау. Жиналған мәліметтер орман экожүйесінің жалпы ахуалын саралауға, қорғау шараларын тиімді жоспарлауға және биологиялық әртүрлілікті сақтауға негіз болады.
Мұндай жұмыстар табиғи тепе-теңдікті сақтау ісінде ерекше маңызға ие. Табиғатты қорғау қызметкерлерінің жүйелі еңбегі – болашақ ұрпаққа бай да көркем табиғатты аман жеткізудің кепілі.
