Катонқарағайда алғашқы қар жер бетін ағартып, ормандағы аңдардың ізін айқындай түсті. Усть-Язовая орманшылығының инспекторлары кезекті бақылау кезінде еліктерді суретке түсіріп, қар бетіне түскен іздерін де байқады. Табиғат аясындағы мұндай кездесулер — олардың күнделікті жұмысының бір бөлігі.
Елік — сақ жануар. Адамның жақындағанын сезсе, қалың ағаш арасына сіңіп кетеді. Ал қарда қалған ізі оның қай тұстан өткенін, қай бағытқа жүргенін аңғартады. Инспекторлар үшін бұл — орман тіршілігін бақылауға, жануарлардың таралу аумағын анықтауға және санақ жүргізуге қажетті мәлімет.
Соңғы санақ деректері бойынша Катонқарағай мемлекеттік ұлттық табиғи паркінде 2 207 елік тіркелген. Екі мыңнан астам еліктің мекенін сақтау күнделікті әрі жүйелі жұмысты қажет етеді. Инспекторлар аумақты аралап, жануарларды бақылап, заңсыз аң аулаудың алдын алады. Жыл бойы жиналған бақылау деректері жануарлар дүниесінің жай-күйін бағалауға көмектеседі.
Табиғатты қорғау жұмысының көп бөлігі көпшілікке көріне бермейді. Оның артында орман жолымен жүрген талай шақырым, суықта өткен кезекшілік, қардағы ізге үңілген мұқият бақылау бар. Усть-Язовая орманшылығында түсірілген еліктердің суреті осы еңбектің мәнін көрсетеді: жабайы жануар өз мекенінде еркін тіршілік етуі керек.
